OnwardDominicans

“Pagninilay sa malasakit at presensiya ni Maria”

“Kasama si Maria, natututo tayong umasa; Kasama si Maria, natututo tayong magmahal.”

Binigyang-diin ni Rdo. P. Mandy Malijan, OP sa kaniyang homiliya ang malaking pagkakaiba ng dalawang ugali: ang “ma” o “malay ko” ng mayamang lalaki—na walang pakialam sa kapwa, at ang “pa” o “pakialam ko” na siyang tunay na diwa ng pananampalataya.

“Ang kwento ay isang babala tungkol sa kawalan ng malasakit sa kapwa. Kapag ang puso ay nananatiling manhid, wala itong lugar para sa biyaya ng Diyos,” ayon kay P. Malijan.

Sa bawat “Aba Ginoong Maria” na binibigkas sa rosaryo, pinaaalala na dapat isabuhay ang malasakit at pag-ibig. Hindi sapat ang pagdarasal kung hindi ito humahantong sa pagkilos para sa kapwa sabi niya.

Ang Family Rosary Crusade ay hindi lamang pagsamba, kung hindi hamon na gawing mas buhay ang presensiya ng Diyos sa ating mga tahanan at komunidad.

Binigyang-pansin din ng pagninilay ang Birheng Maria na laging nasa paligid ng kaniyang mga anak. Mula sa kasal sa Cana hanggang sa paanan ng Krus, ipinakita ni Maria ang isang pusong mapagmalasakit at bukas sa kalooban ng Diyos.

Hinihikayat ang mga pamilya na tularan ang kaniyang halimbawa—ang hindi pagiging manhid sa pangangailangan ng iba.

Sa pagpapatuloy ng ika-31 na Family Rosary Crusade, ipinapaalala na ang pamilyang nagdarasal ng rosaryo ay hindi nagsasabing “ma” o malay ko” kundi nagpapatunay ng “pa” o pake ko.”

photos courtesy of the OD FRC Media Team